Hei alle saman!
Først: Eg er ein herremann som held hus i Bergen, og etter nokre år med tilbakelent nysgjerrigheit for heimebryggjing tok eg og ein ven fatt på vår eiga bryggjing no i haust. Vi har laga sju brygg til no, eit par av dei heilt udrikkelege, andre nokså middelmådige, og dei siste ganske gode. Læringskurva er bratt, og motivasjonen på topp. Vi har snike litt i kulissane på forumet her, og fått tips og råd til litt av kvart, så dette er ein god ressurs. Og no endeleg som registrert brukar vil eg vonaleg involvere meg endå meir. Framover!
Vidare: Eg arbeider med grafisk design på heiltid, som frilanser. Eg fatta naturleg nok interesse for denne tråden, og tenkte å kome med nokre skisser, og nokre gode råd.
Eg ser at det ikkje er største pågangen i denne tråden, og eg vil anta at det er fleire grunnar til det men det har ikkje med mangel på kreativitet å gjere, for det er mykje kreativitet hos heimebryggjarane! Ein av grunnane kan vere at det å teikne (gode) logoar for verksemder og lag er eit yrke, der dei som arbeider med faget har innarbeidd kunnskap om idéprosessar, form- og fargelære og estetikk, og der designeren sit på solide verktøy og erfaring som kan ta den gode idéen vidare til ei ferdig løysing. Skal ein ha ein meiningsberande og gjennomtenkt logo som skal gjera jobben sin lenge, vil eg tilrå å la ein fagmann sjå på det. Logoen din skal fortelje alle som ser han kven du er, kva du gjer og kva du står for. Då bør logoen i tillegg til å sjå bra ut ha litt substans.
Å invitere mange til å kome med forslag og skisser kan vere fristande, fordi ein då potensielt kan få hundrevis av gode idéar i fanget, men kun betale for éin av dei. Ein gå for det ein synest ser best ut, gje vinnaren ein symbolsk sum, og så er den saka ute av verda. Men problema er ofte mange: Det kjem ein ikkje inn mange nok bidrag, eller dei er av for dårleg kvalitet fagleg sett (sidan det ikkje er profesjonelle som sender inn), eller dei er av for dårleg kvalitet teknisk sett (skal kunne brukast på mange ulike flater, i ulike storleikar, i ulike fargar, på nett og på trykk), og etter mitt syn den største mangelen: den gode dialogen mellom kunde og designer er minimal eller i verste fall heilt fråverande. Teikninga av logoen er ein ting, men før ein kjem så langt bør ein ha gått gjennom ein grundig idéprosess, slik at resultatet også fungerer best mogleg.
Det beste rådet eg kan gje til nokon som ynskjer seg ein logo: snakk med ein designer. Det kostar ikkje noko å ringe, og ein kan gjerne få eit betre syn på kva ein faktisk har behov for, korleis ein skal ta fatt på det heile, og kanskje får ein eit tilbod som ikkje er avskrekkande for klubbkassa heller.
Så: skisser. For å vere så hyklersk som eg berre kan på ein måndag så har eg har leika meg litt og skissert litt idéar, som eg limer inn her. Dette er ikkje noko ferdig utkast, men ei mogleg retning. Det er holdt nokså enkelt og tradisjonelt, med korn og humle/eld, og eit lite hus inni der (det er jo heimebryggjing, dette). Alt dette må jobbast vidare med, og då vil eg oppfordre til å ta kontakt med meg på kb (krøll) multipleks (punkt) no, slik at vi kan snakke nærare om vegen vidare. Eg bidrar sjølvsagt med fargepalett, typografi og andre ting som høyrer med i ein grafisk profil, og ymse logovariantar, gråtonar, i spesifikke storleiker for favicons m.m. Eg kan gjerne også raffinere andre retningar som måtte bli aktuelle. Idéen er det viktigaste her, det estetiske kan alltid gjerast bra. Og Norbrygg fortener ein god logo!
